Erinnerig

  Endzeitprophetie  

Geschrieben von Klingeling am 31. Dezember 2005 09:34:01:

Als Antwort auf: Pracht der Nacht - des Tages Last geschrieben von Klingeling am 18. Dezember 2005 09:05:33:

Nei au, wie d'Jöhrli flüget, und d'Zyt, wie sie vergoht,
wie s'Ührli immer gschwinder die Morgestonde schloht...
I mue grad nünt as stuune. Jä wa! … Und's fallt mer I:
I sei so gwöss erscht vorig no so-n-e Büebli gsi!
Und hei jo gwöss erscht vorig, no kum recht stuehlbei-gross,
am blaue Zipfel gsuget vo's Muetters Chochischoss.
Und ehre denn e Chüssli uf beidi Bäggli ggee,
und ehres Gsichtli lache-n-und d'Auge lüchte gseh. - -

No liet mer's hinderscht Wörtli im Ohr wie Gloggeton,
wo sie 'mol zue mer gseit hät: „I weiss, ... es werd so cho! –
Mys Herzli luegt und sorget jetz was 's no cha för di,
und hanged a der Hoffnig: 's wird nöd vergebe sy ...
Und 's cha's fascht nöd erwarte, bis d'Buebeschueh verlohscht
und volle Chraft und Yfer dyn Weg is Lebe gohscht.
... "I will's zu öppis bringe!" met starchen-n-Arme seischt,
und wie-n-e waggers Bömli zmol au dyn Sege träischt.
Und denn so füürig brichtescht, wa der scho groote sei ...
Das möchti no erlebe, ... denn zieh mi zfrede hei! –
Möcht ein no ghöre rüehme: "Woll Frau, der wird no guet;
de wird syn Rangg scho finde, dem brecht gwöss nünt den Muet!
... Und aber lueg, ...es isch mer, myn Bueb! es werd so cho;
Die Freud erlebi nümeh, ...i mue ... vorane ... goh! - -
I ghör die nümeh säge: "Du Muetter, hängg mer y,
e chlyses Obedtüürli isch gwöss au gsond für di? –
Denn cha der schö verzelle, was alles lauft und goht,
wie's met mym Schaffe-n-usgsieht, wie's met mym Herzli stoht! – "

O Muetter, lueg, i gspüehres no jetz und bis as End,
wie dyni fryne Finger deby mi gstrychlet händ . . .
Und mängmol meini sicher: du stöhnisch hind'mer zue,
und luegsch mer öber d'Achsle, wa-n-i so schaff und tue. –
Und weidli chehr mi ome: "Du Muetter, säg mer, wie..."
und cha's fascht nöd begryfe, wenn i di niene gsieh!
Und cha's fascht nöd begryfe, dass d'Zyt deweg vergoht,
und dass dys goldig Herzli syt langem nümeh schloht!
Dass au dys stille Gsichtli syt langem nümeh schynt
und eim, was Jöhrli bhüetet, e-n-einzigs Stöndli nimmt!


Wilhelm Hartmann





Antworten:

  Endzeitprophetie